ଭଦ୍ରକ/ଭୁବନେଶ୍ୱର: କରୋନା କୋପରୁ ମୋ ସ୍ୱାମୀଙ୍କୁ ତ ବଞ୍ଚାଇ ପାରିଲନି । ଏହି ଟଙ୍କା ଆଉ କାହାର ଜୀବନ ବଞ୍ଚାଇବାରେ ତ ସାହାଯ୍ୟ କରିପାରିବ!!
ଆଜି ଭଦ୍ରକ ଜିଲ୍ଲାପାଳ ଅଫିସ୍ ଆସିଥିବା ବାସୁଦେବପୁର ମନ୍ଦାରି ଅଞ୍ଚଳର ମୌସୁମୀ ମହାନ୍ତିଙ୍କର ଏହା ଥିଲା କୋହଭରା ଆବେଦନ । କରୋନା ସହ ଦୀର୍ଘ ୪ ମାସର ଲଢ଼େଇ ପରେ ତାଙ୍କ ସ୍ୱାମୀ ଅଭିଷେକ ମହାପାତ୍ର ଗତବର୍ଷ ସେପ୍ଟେମ୍ବର ୩ ତାରିଖରେ ଆରପାରିକୁ ଚାଲିଯାଇଥିଲେ । ଆବଶ୍ୟକ ହୋଇଥିବା ଇକମୋ ଚିକିତ୍ସା ପାଇଁ ସେ ଜନସାଧାରଣଙ୍କଠାରୁ ଆର୍ଥିକ ସହାୟତା ଯୋଗାଡ଼ କରିଥିଲେ ମଧ୍ୟ ସ୍ୱାମୀଙ୍କୁ ବଞ୍ଚାଇ ପାରି ନ ଥିଲେ । ଏବେ ସେହି ବଳକା ଟଙ୍କାକୁ ନିଜ ପାଖରେ ନ ରଖି ମୌସୁମୀ ମୁଖ୍ୟମନ୍ତ୍ରୀଙ୍କ ରିଲିଫ୍ ପାଣ୍ଠିକୁ ୩୦ ଲକ୍ଷ ଟଙ୍କା ଏବଂ ଭଦ୍ରକ ଜିଲ୍ଲା ରେଡକ୍ରସ୍ କୁ ୧୦ ଲକ୍ଷ ଟଙ୍କା ଦେଇଛନ୍ତି । ମୌସୁମୀଙ୍କର ଏହି ମହାନତା ସମଗ୍ର ରାଜ୍ୟରେ ଚର୍ଚ୍ଚାର ବିଷୟ ହୋଇଛି ।
