ଭୁବନେଶ୍ୱର: ଏସିଆନ୍ ଆଥଲେଟିକ୍ ଚମ୍ପିଆନସିପ୍ ଆୟୋଜନରେ ୫୦ କୋଟିର ସ୍କାମ୍ । ବିିଭିନ୍ନସ୍ତରରେ ଏଭଳି ଅଭିଯୋଗ ଉଠିଛି । ସୁତରାଂ ଓଡ଼ିଶା ସରକାର ସଫଳତାର ସହ ଏହାର ଆୟୋଜନ କରିଥିଲେ ମଧ୍ୟ ସ୍କାମ୍ ଗନ୍ଧରୁ ମୁକ୍ତି ପାଇନାହାନ୍ତି । କଳିଙ୍ଗ ଷ୍ଟାଡିୟମ୍ ରେ ୯୦ ଦିନ ମଧ୍ୟରେ ଏହି ମେଗା କ୍ରୀଡ଼ା ମହୋତ୍ସବର ଆୟୋଜନ କରି ବାହାବା ଗୋଟାଇଛନ୍ତି ରାଜ୍ୟ ସରକାର । ମାତ୍ର ଏହି ମହୋତ୍ସବ ସୁଯୋଗରେ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରି ଯେଭଳି ନିଜର ପ୍ରଚାର ଓ ପ୍ରସାର କରାଇଲେ ତାହା ହିଁ ସ୍କାମ୍ ର ସୂତ୍ରପାତ କରାଇଛି । ଏସିଆନ୍ ଆଥଲେଟିକ୍ ଆସୋସିଏସନ୍ ନାଁକୁ ଗିଳି ରାଜ୍ୟ ସରକାର ନିଜ ନାଁକୁ ଚମକାଇଛନ୍ତି । ପ୍ରାୟୋଜକ ସଂସ୍ଥାମାନଙ୍କଠାରୁ କୋଟି କୋଟି ଟଙ୍କା ଆଣି ମନଇଚ୍ଛା ଖର୍ଚ୍ଚ କରିଛନ୍ତି । ସେଥିରୁ ଅର୍ଦ୍ଧାଧିକ ଚଳୁ ହୋଇଥିବା ଅଭିଯୋଗ ହୋଇଛି । ଅତ୍ୟନ୍ତ ଚତୁର ଢ଼ଙ୍ଗରେ କରାଯାଇଥିବା ଏହି କାରବାର ପଛରେ ଏକ ବଡ଼ ରାକେଟ୍ ରହିଥିବା କୁହାଯାଉଛି ।
ପ୍ରତି ଦୁଇବର୍ଷରେ ଅନୁଷ୍ଠିତ ହେଉଛି ଏସିଆନ୍ ଆଥଲେଟିକ୍ ଚମ୍ପିଆନସିପ୍ । ଏହାର ୨୨ତମ ଇଭେଣ୍ଟ ଝାଡ଼ଖଣ୍ଡର ରାଞ୍ଚିଠାରେ ଆୟୋଜନ କରାଇବାକୁ ପ୍ରଥମେ ସ୍ଥିର ହୋଇଥିଲା । ମାତ୍ର ଆୟୋଜନର ସାମର୍ଥ ନ ଥିବାରୁ ଝାଡ଼ଖଣ୍ଡ ସରକାର ସେଥିରୁ ଓହରିଯାଇଥିଲେ । ଏହାପରେ ଓଡ଼ିଶା ସରକାରଙ୍କ ସମ୍ମତିକ୍ରମେ କଳିଙ୍ଗ ଷ୍ଟାଡିୟମ୍ କୁ ବଛାଯାଇଥିଲା । ହାତରେ ୯୦ ଦିନ ସମୟ ଥାଇ ସରକାର ଆୟୋଜନ ଆରମ୍ଭ କରିଥିଲେ । ଯୁଦ୍ଧକାଳୀନ ଭିତ୍ତିରେ କଳିଙ୍ଗ ଷ୍ଟାଡିୟମ୍ କୁ ନବକଳେବର କରାଇଥିଲେ । ଖାଲି ସେତିକି ନୁହେଁ, ରାଜଧାନୀର ମୁଖ୍ୟ ରାସ୍ତା, କାନ୍ଥବାଡ଼କୁ ବି ରଙ୍ଗିଲା କରିଥିଲେ । ନିଜ ବାହାବା ବଖାଣି ରାସ୍ତାଘାଟକୁ ହୋଡିଂରେ ଛାଇ ଦେଇଥିଲେ । ଆୟୋଜନର ଦାୟିତ୍ୱ କ୍ରୀଡ଼ା ବିଭାଗ ହାତରେ ନ୍ୟସ୍ତ ଥିଲେ ମଧ୍ୟ ସରକାରଙ୍କ ପ୍ରାୟ ସବୁ ବିଭାଗକୁ ଏଥିରେ ସାମିଲ କରାଯାଇ ଅଜସ୍ର ଟଙ୍କା ଖର୍ଚ୍ଚ କରାଯାଇଥିଲା । କେବଳ କ୍ରୀଡ଼ା ବିଭାଗ ୩୦ କୋଟି ୮୪ ଲକ୍ଷ ଟଙ୍କା ଖର୍ଚ୍ଚ କରିଥିବା ବିଭାଗୀୟ ସଚିବ କହିଛନ୍ତି । ଅନ୍ୟାନ୍ୟ ବିଭାଗର ଖର୍ଚ୍ଚସବୁକୁ ମିଶାଇଲେ ଏହା ୫୦ କୋଟି ଟପିବ ବୋଲି ଆକଳନ କରାଯାଉଛି ।
ତେବେ ଓଡ଼ିଶାର ଗୌରବ ବଢ଼ାଇଥିବା ଏତେବଡ଼ କ୍ରୀଡ଼ା ମହୋତ୍ସବର ସଫଳ ଆୟୋଜନ ପାଇଁ ସରକାର ବାହାବା ପାଇବାକୁ ଯେ ହକଦାର ତାହା କେହି ଅସ୍ୱୀକାର କରୁନାହାନ୍ତି । ମାତ୍ର ପରଦା ପଛରେ ଏଥିପାଇଁ କୋଟି କୋଟି ଟଙ୍କା ଲୁଟ୍ ହୋଇଯାଇଛି । ସ୍ପନସରସିପ୍ ନାଁରେ କୋଟି କୋଟି ଟଙ୍କା ଆଦାୟ ହୋଇଛି ଯାହାର ଥଳକୂଳ ମିଳୁନି । ତେଣେ ଚମ୍ପିଆନସିପ୍ ଆୟୋଜନ ପାଇଁ ଏସିଆନ୍ ଆଥଲେଟିକ୍ କାଉନସିଲ୍ ରେ ମୋଟା ଅଙ୍କର ବ୍ୟୟବରାଦ ହୋଇଥିବା ଜଣାପଡିଛି । ମାତ୍ର ସେ ଟଙ୍କା ଗଲା କୁଆଡେ? ଓଡ଼ିଶା ସରକାର ଏହାର ହୋଷ୍ଟିଂ ଦାୟିତ୍ୱ ନେଇଥିବାରୁ କେବଳ ଷ୍ଟାଡିୟମ୍ ନବୀକରଣ ବାବଦରେ ଯାହା ଖର୍ଚ୍ଚ କରିବା କଥା । ବାକି ଆଥଲେଟ୍ ଙ୍କ ଯିବା ଆସିବା ରହଣି ଖର୍ଚ୍ଚ ସବୁ ଆଥଲେଟିକ୍ ଆସୋସିଏସନ୍ ର । ଏହାର ସ୍ପନସରସିପ୍ ବାବଦକୁ ଆସିଥିବା ଟଙ୍କା ବି ଆସୋସିଏସନ୍ ହାତକୁ ଯିବା କଥା ବୋଲି ନିୟମ କହୁଛି ।
ତେବେ ଏଠାରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । ରାଜ୍ୟ ସରକାର ରାଜ୍ୟ ରାଜକୋଷରୁ ମନଇଚ୍ଛା ଅଜସ୍ର ଟଙ୍କା ଖର୍ଚ୍ଚ କରିଛନ୍ତି । ପ୍ରଚାର ଓ ପ୍ରସାର ନାଁରେ ସରକାରଙ୍କ ବାହାଦୁରି ବଖାଣିଛନ୍ତି । ଟିଭି ଓ ଖବରକାଗଜରେ କୋଟି କୋଟି ଟଙ୍କାର ବିଜ୍ଞାପନ ଦେଇ ସରକାରଙ୍କ ସଫଳତା ଗାନ କରିଛନ୍ତି । କୌଣସି ବିଜ୍ଞାପନରେ ମୁଖ୍ୟ ଆୟୋଜକ ଏସିଆନ୍ ଆଥଲେଟିକ୍ ଆସୋସିଏସନ୍ ର ନାଁ ଗନ୍ଧ ଦେଖିବାକୁ ମିଳିନି । ଏଣେ ସ୍ପନସିରସିପ୍ ବାବଦ ଟଙ୍କା କେତେ ଆସିଛି ଏବଂ କେତେ ବାକି ଅଛି ତାହା ବି ନିର୍ଦ୍ଦିଷ୍ଟ ଭାବେ କୁହାଯାଉନି । ଆସୋସିଏସନ୍ ଟଙ୍କା କଥା ବି କାହାରି ତୁଣ୍ଡରେ ଆସୁନି ।
ବାସ୍ତବରେ ଏସିଆନ୍ ଆଥଲେଟିକ୍ ଆସୋସିଏସନ୍ ପକ୍ଷରୁ ୨୨ତମ କ୍ରୀଡ଼ା ମହୋତ୍ସବ ପାଇଁ କେତେ ଟଙ୍କା ଆସିଛି ଏବଂ ରାଜ୍ୟ ସରକାର ନିଜ ରାଜକୋଷରୁ କେତେଟଙ୍କା ଖର୍ଚ୍ଚ କରିଛନ୍ତି ସରକାର ତାହାର ହିସାବ ଦେବାକୁ ବିଭିନ୍ନ ମହଲରୁ ଦାବି ହେଉଛି । ଏଥିସହ ସ୍ପନସରସିପ୍ ଟଙ୍କାର ହିସାବପତ୍ର ରାଜ୍ୟ ସରକାର ସର୍ବସାଧାରଣଙ୍କ ପାଖରେ ରଖିବାକୁ ଦାବି ହୋଇଛି । ସବୁଠାରୁ ରୋଚକ କଥାଟି ହେଉଛି, ବିଜେପି ଏହି କ୍ରୀଡ଼ା ମହୋତ୍ସବକୁ ବର୍ଜନ କରିଥିଲେ ମଧ୍ୟ ସ୍କାମ୍ ବାବଦରେ ମୁହଁ ଖୋଲୁନାହିଁ । ଏସିଆନ୍ ଆଥଲେଟିକ୍ ଚମ୍ପିଆନସିପ୍ ବାବଦରେ ଧର୍ମେନ୍ଦ୍ର ପ୍ରଧାନଙ୍କ ଟ୍ୱିଟର୍ ଆକାଉଣ୍ଟରେ ତାଲା ପଡ଼ିଯାଇଛି । ତୁଚ୍ଛା କଥାରେ ସାମ୍ବାଦିକ ସମ୍ମିଳନୀ ଡାକୁଥିବା ସଜ୍ଜନ ଶର୍ମା, ସମୀର ମହାନ୍ତି କିମ୍ବା ଗୋଲକ ମହାପାତ୍ରଙ୍କ ଭଳି ନେତାଙ୍କ ପାଟିରେ ବି ତାଲା ପଡ଼ିଛି । ସୁତରାଂ ଅଭିଯୋଗ ହେଉଥିବା ଏହି ସ୍କାମ୍ ରେ ବିଜେପି ନେତାଙ୍କ ଭାଗ ରହିଥିବା ସାଧାରଣରେ ଚର୍ଚ୍ଚା ହେଉଛି ।
