ଭୁବନେଶ୍ୱର: ଶିଶୁଭବନରେ ପୁଣି ଗଡୁଛି ଶିଶୁ ମଡ଼କ । ଦି ଦିନରେ ମୃତ୍ୟୁ ସଂଖ୍ୟା ୧୦ ଟପିଲାଣି ବୋଲି ବିଶ୍ୱସ୍ତ ସୂତ୍ରରୁ ଖବର ମିଳିଛି । ଦି ବର୍ଷ ତଳେ ଶିଶୁ ମଡ଼କକୁ ନେଇ ଚର୍ଚ୍ଚାରେ ଥିବା ଶିଶୁଭବନରେ ଅଭାବନୀୟ ଘଟଣାର ପୁନରାବୃତ୍ତି ଘଟିଛି । ଏହି ସମ୍ବେଦନଶୀଳ ଘଟଣାଟିକୁ ଗଣମାଧ୍ୟମ ନଜରରୁ ହଟାଇବା ପାଇଁ ସ୍ୱାସ୍ଥ୍ୟ ବିଭାଗ ଓ ଶିଶୁଭବନ କର୍ତ୍ତୃପକ୍ଷ ପ୍ରାଣମୂର୍ଚ୍ଛା ଲାଗିପଡ଼ିଛନ୍ତି । ଖବର ଯେଭଳି ପ୍ରଘଟ ନହୁଏ ସେଥିପ୍ରତି ସତର୍କ ଦୃଷ୍ଟି ରଖିଛନ୍ତି । ଆଜି ସକାଳୁ ଶିଶୁଭବନ ଅଧୀକ୍ଷକ ସରୋଜ ଶତପଥୀ ସେଠାରେ ଉପସ୍ଥିତ ରହିଥିବା ବେଳେ ଅଚଳ ହୋଇ ପଡ଼ି ରହିଥିବା ଏସିଗୁଡ଼ିକୁ ସଚଳ କରିବା ପାଇଁ ଜିଇଡି କର୍ମଚାରୀଙ୍କୁ ଲଗାଯାଇଛି ।
ଶିଶୁଭବନର ଜଣେ ଡାକ୍ତରଙ୍କ କହିବାନୁଯାୟୀ, ହଠାତ୍ ଏତେ ସଂଖ୍ୟକ ଶିଶୁ ମୃତ୍ୟୁ ପଛର କାରଣ ହେଉଛି ପ୍ରଚଣ୍ଡ ଖରା ଓ ଗୁଳୁଗୁଳି । ଶିଶୁଭବନର ଅଧିକାଂଶ ଏସି ଦୀର୍ଘଦିନ ଧରି ଅଚଳ ରହିଛି । ଏହାକୁ ସଜାଡ଼ିବାପାଇଁ କେହି ଦୃଷ୍ଟି ଦେଇନାହାନ୍ତି । ଅସହ୍ୟ ଗରମରେ ଛଟପଟ ହୋଇ ଶିଶୁମାନେ ମୃତ୍ୟୁବରଣ କରୁଥିବା ସଂପୃକ୍ତ ଡାକ୍ତର ନିଜ ନାଁ ଗୋପନ ରଖିବା ସର୍ତ୍ତରେ ସ୍ୱୀକାର କରିଛନ୍ତି । ଅନ୍ୟପକ୍ଷରେ ବିଶ୍ୱସ୍ତ ସୂତ୍ରରୁ ମିଳିଥିବା ଖବର ଅନୁଯାୟୀ,ଗତ ଦୁଇ ବର୍ଷ ଭିତରେ ଶିଶୁଭବନ ଅବସ୍ଥାରେ ସେଭଳି ଆଖିଦୃଶିଆ ଉନ୍ନତି ହୋଇନାହିଁ । ୨୦୧୫ ଅଗଷ୍ଟ ମାସରେ ଶିଶୁଭବନରେ ଶିଶୁମଡ଼କ ଘଟଣା ସାରା ରାଜ୍ୟରେ ହଇଚଇ ସୃଷ୍ଟି କରିଥିଲା । ରାଜ୍ୟ ସରକାରଙ୍କୁ ଏହା ଦୋହଲାଇ ଦେଇଥିଲା । କେନ୍ଦ୍ର ସରକାର ମଧ୍ୟ ଏଥିରେ ମୁଣ୍ଡ ଖେଳାଇଥିଲେ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନେତୃତ୍ୱରେ ରାଜ୍ୟ ବିଜେପି ଏହି ଘଟଣାରୁ ବେଶ୍ ଫାଇଦା ଉଠାଇବାକୁ ଉଦ୍ୟମ କରିଥିଲା । କେନ୍ଦ୍ରରୁ ଏକ ବିଶେଷଜ୍ଞ ଟିମ୍ ଶିଶୁଭବନ ଆସି ଅନୁଧ୍ୟାନ କରିଥିଲେ । ଏପଟେ ରାଜ୍ୟ ସରକାର ମଧ୍ୟ ଶିଶୁଭବନର ଉନ୍ନତିକରଣ ପାଇଁ ପ୍ରତିଶ୍ରୁତି ଢ଼ାଳିଦେଇଥିଲେ । ଏଭଳି ଘଟଣାର ପୁନରାବୃତ୍ତି ହେବନି ବୋଲି ଆଶ୍ୱାସନା ଦେଇଥିଲେ । ହେଲେ ଅବସ୍ଥା ଯଥା ପୂର୍ବଂ ତଥା ପରଂ । ଓଲଟି ଘଟଣାକୁ ଚପାଇବା ପାଇଁ ନୂଆ ସ୍ୱାସ୍ଥ୍ୟମନ୍ତ୍ରୀ ଓ ତାଙ୍କ ଅଫିସରଙ୍କଠାରୁ ଆରମ୍ଭ କରି ଶିଶୁଭବନ କର୍ତ୍ତୃପକ୍ଷ ଯାଏଁ ସମସ୍ତେ ଲାଗିପଡ଼ିଛନ୍ତି ।
ସୂଚନାଯୋଗ୍ୟ, ସ୍ୱାସ୍ଥ୍ୟମନ୍ତ୍ରୀ ପ୍ରତାପ ଜେନା କଟକ ସହର ବାସିନ୍ଦା । ସ୍ୱାସ୍ଥ୍ୟମନ୍ତ୍ରୀ ହେବା ପରେ ଶିଶୁଭବନ ପ୍ରତି ତାଙ୍କର ଅଧିକ ଦୃଷ୍ଟି ରହିବ ବୋଲି ଆଶା କରାଯାଉଥିଲା । ମାତ୍ର ଶପଥ ନେବାର ଦିନକ ପରେ ଭୁବନେଶ୍ୱର ସରକାରୀ ବାସଭବନ କଡ଼ରେ ଥିବା କ୍ୟାପିଟାଲ୍ ହସ୍ପିଟାଲ୍ କୁ ହାପ୍ ପ୍ୟାଣ୍ଟ ଓ ଟି ସାର୍ଟ ପିନ୍ଧି କୁଆଡ଼େ ଅଚାନକ ପରିଦର୍ଶନରେ ଯାଇଥିଲେ । ବାସ୍ତବରେ ମିଡ଼ିଆ ଭାଇଙ୍କୁ ଆଗୁଆ ଖବର ଦେଇ ହସ୍ପିଟାଲ୍ କୁ ମନ୍ତ୍ରୀ ସେମାନଙ୍କୁ ସାଙ୍ଗରେ ନେଇ ଯାଇଥିଲେ । ନିଜର ପ୍ରଚାର ପାଇଁ ଏସବୁ କରାଯାଇଥିଲା ବୋଲି ତାହା ପ୍ରମାଣିତ କରିଥିଲା । ନିଜ ପ୍ରଚାରରେ ମାତିଥିବା ମନ୍ତ୍ରୀ ନିଜ ମାଟିର ବହୁଚର୍ଚ୍ଚିତ ଶିଶୁଭବନର ଦୁର୍ଦ୍ଦଶା ଓ ଶିଶୁମଡ଼କୁ ନଜର ଅନ୍ଦାଜ କରିବା କଟକ ସହରରେ ଗୁଞ୍ଜରଣ ସୃଷ୍ଟି କରିଛି । ମନ୍ତ୍ରୀ ଘଟଣାକୁ ଚପାଇ ନିରୀହ, ନିଷ୍ଫାପ ଶିଶୁଙ୍କ ଜୀବନ ସହିତ ଖେଳ ଖେଳିଲେ ପରିସ୍ଥିତି ଆହୁରି ସାଂଘାତିକ ହେବ ବୋଲି ଅନେକ ସତର୍କ କରାଇ ଦେଇଛନ୍ତି ।
