ସାତ ପୁରୁଷ ପାଇଁ ଲୁଟିଛନ୍ତି ଆଇଏଫଏସ୍ ବାବୁ

ଭୁବନେଶ୍ୱର: ଜଙ୍ଗଲ ବିଭାଗର ଅତିରିକ୍ତ ସିସିସିଏଫ୍ ବିହାରୀ ବାବୁ ଅଭୟକାନ୍ତ ପାଠକଙ୍କ ସମ୍ପତ୍ତି ଭାରରେ ଭିଜିଲାନସ୍ ଅଧିକାରୀମାନେ ଥକିଗଲେଣି । ଗତକାଲି ସକାଳୁ ଭୁବନେଶ୍ୱରର ୫ଟି ସ୍ଥାନ ସମେତ ୪ ରାଜ୍ୟର ୧୨ ସ୍ଥାନରେ ଚଢ଼ଉ ଜାରି ରଖିଛନ୍ତି ୧୫୦ ଜଣିଆ ଟିମ୍ । ଯୁଆଡେ ହାତ ବୁଲାଇଲେ ମିଳୁଛି ପୁଳା ପୁଳା ସମ୍ପତ୍ତି । ଆଲିସାନ୍ ଘର, ଦାମୀ କାର୍, ଭ୍ରମଣ ପାଇଁ ବ୍ୟବହୃତ ଚାର୍ଟର ପ୍ଲେନ୍ ଟିକେଟ୍ ସାଙ୍ଗକୁ ନଗଦ ଲକ୍ଷ ଲକ୍ଷ ଟଙ୍କା । ଘରର ଆସବାବପତ୍ର ଗୁଡ଼ିକ ଏତେ ଦାମୀ ଯେ ସତେ ଯେମିତି ମହୁ ଝରୁଛି ।

ମୁମ୍ବାଇରେ ପୁଅ ଆକାଶ ବି ରାଜକୀୟ ଜୀବନ କାଟୁଛି । ଟଙ୍କା ଚଳୁ କରିବାର କଳା ବାପାଙ୍କଠାରୁ ଶିଖିଯାଇଛି । ବାପାଠାରୁ ଅଧିକ ଧୂରନ୍ଧର ବୋଲି ନିଜକୁ ପ୍ରମାଣିତ କରିଦେଇଛି । ବିଟେକ୍ ପାସ୍ କରିଥିବା ଏହି ପୁଅ ପାଇଁ ପୁନେରେ ୫ ଲକ୍ଷ ଟଙ୍କା ଭଡ଼ାରେ ଫ୍ଲାଟ୍ ଯୋଗାଇ ଦେଇଥିଲେ । ଏକ ଫାର୍ମ ହାଉସ୍ ବି ଲିଜ୍ ରେ ନେଇଥିଲେ । ସେଠାରେ ପୁଅ ସାଙ୍ଗରେ ଅଧିକାଂଶ ସମୟ କଟୁଥିଲା ପାଠକ ପରିବାର ସଦସ୍ୟଙ୍କର ।

ବାପାର କଳାଟଙ୍କାରେ ଅୟସ କରୁ କରୁ ନିଜେ ବି ଲୋକଙ୍କୁ ଠକି କଳାଟଙ୍କା ରୋଜଗାରର ଗଳାବାଟ ପାଇଗଲା । ନିଜକୁ ଟାଟା ମୋଟର୍ସ ଟ୍ରାନ୍ସପୋର୍ଟ ଡିଭିଜନର ଏମଡି ପରିଚୟ ଦେଇ ବେକାର ଯୁବକଙ୍କୁ ଚାକିରି ଦେବାକୁ କହି ଲୁଟୁଥିଲା । ଏତେ ଧୂର୍ତ୍ତ ଯେ ଟାଟା ମୋଟର୍ସ ଲୋଗୋକୁ ନକଲ କରି ଜାଲ୍ ଇ-ମେଲ୍ ଆଇଡି ତିଆରି କରିଥିଲା । କମ୍ପାନୀ ପକ୍ଷରୁ ଆକାଶ ନାଁରେ କ୍ରାଇମବ୍ରାଞ୍ଚ ସାଇବର ଥାନାରେ ମାମଲା ରୁଜୁ ହୋଇଛି । ଭିଜିଲାନସ୍ ର ଏକ ସ୍ୱତନ୍ତ୍ର ଟିମ୍ ତାକୁ ମୁମ୍ବାଇରୁ ଆଜି ରାତିରେ ଭୁବନେଶ୍ୱର ଆଣି ପଚରାଉଚୁରା ଆରମ୍ଭ କରିଛନ୍ତି ।

ଜଣେ ସରକାରୀ ଅଧିକାରୀଙ୍କଠାରୁ ଏତେ ବିପୁଳ ପରିମାଣର ଅମାପ ସମ୍ପତ୍ତି ଠାବ ହେବା ଓଡ଼ିଶା ଇତିହାସରେ ପ୍ରଥମ ଘଟଣା ବୋଲି କୁହାଯାଉଛି । ଏତେ ଟଙ୍କା ଯେ ଡ୍ରାଇଭର ଘରେ ବି ରଖିବାକୁ ପଛାଇ ନାହାନ୍ତି । ଡ୍ରାଇଭର ଘରୁ ମିଳିଛି ନଗଦ ୨୦ ଲକ୍ଷ ଟଙ୍କା । ପୁତୁରା ପାଖରୁ ମିଳିଛି ୫୦ ଲକ୍ଷ ଟଙ୍କା । ୟୁନିଟ୍-୯ ସ୍ଥିତ ସରକାରୀ ବଙ୍ଗଳାରୁ ମିଳିଛି କେଜିଏ ସୁନା । ନଗଦ ଟଙ୍କାଠାରୁ ଆରମ୍ଭ କରି ଗହଣା, ବ୍ୟାଙ୍କ ବାଲାନ୍ସ , ଗହଣା ଏତେ ବାହାରୁଛି ଯେ ତାକୁ ଆକଳନ କରିବା କାଠିକର ହୋଇପଡ଼ିଛି ।

୧୯୮୭ ବ୍ୟାଚ୍ ର ଆଇଏଫଏସ୍ ବାବୁ ଅଭୟକାନ୍ତ ପାଠକଙ୍କ ଅମାପ ସମ୍ପତ୍ତି ସମସ୍ତଙ୍କୁ ଚକିତ କରିଦେଇଛି । ଭୁବନେଶ୍ୱରରେ ଆଲିସାନ୍ ଫ୍ଲାଟ୍, ପାଟନାରେ ବିଶାଳ କୋଠା, ପୁନେରେ ଫାର୍ମ ହାଉସ୍ ସାଙ୍ଗକୁ ବିଭିନ୍ନ ସ୍ଥାନରେ ଆହୁରି ଅନେକ ଫ୍ଲଟ୍ ଓ ପ୍ଲଟ୍ ରହିଛି ତାଙ୍କର । ଘାଟିକିଆ ବିପୁଲ ଗାର୍ଡେନ୍ ରେ ଥିବା ଫ୍ଲାଟ୍ ରେ ଇଟାଲିଅନ୍ ମାର୍ବଲ ଲାଗିଛି । ବେଡରୁମ୍ ରେ ହାତୀ ଦାନ୍ତ ଲାଗିଥିବା ପଲଙ୍କ ପଡ଼ିଛି । ଯାହାର ଦାମ୍ ୬୦ ଲକ୍ଷ ଟଙ୍କା ବୋଲି ଆକଳନ କରାଯାଇଛି ।

ଭୁବନେଶ୍ୱର ସରକାରୀ ବଙ୍ଗଳାକୁ ବି ପ୍ୟାଲେସ୍ କରିଦେଇଛନ୍ତି ବାବୁ ଅଭୟ ପାଠକ । ବଙ୍ଗଳା ଭିତରେ ଧାଡ଼ି ହୋଇ ଛିଡ଼ା ହୋଇଛି ମର୍ସିଡିଜ୍, ବିଏମଡବ୍ଲୁ, ହାରିଅର୍ ଭଳି ଦାମୀ କାର୍ । ସରକାରୀ ଟଙ୍କାକୁ ଚଳୁ କରି ନିଜେ କୋଟି କୋଟି ଟଙ୍କାର ମାଲିକ ବନିଥିବା ଏହି ବାବୁ ନିଜ ପରିବାର ସହ ରାଜକୀୟ ଜୀବନ ବିତାଉଥିବା ଦେଖିବାକୁ ମିଳିଛି ।

ଲକଡାଉନ୍ ବେଳେ ଲୋକେ ଜୀବନ ଓ ଜୀବିକା ସହ ସଂଘର୍ଷ କରି ଭୋକ ଓପାସରେ ଜୀବନ କାଟୁଥିବା ବେଳେ ଏହି ବାବୁ ନିଜ ପରିବାରକୁ ଧରି ଚାର୍ଟର ପ୍ଲେନ୍ ରେ ଦେଶ ବୁଲୁଥିଲେ । ଥରେ କି ଦୁଇଥର ନୁହେଁ, ୨୦ ଥର ଯାଇଛନ୍ତି ଭ୍ରମଣରେ । ଏ ବାବଦରେ ସାଢ଼େ ୪ କୋଟି ଟଙ୍କା ଖର୍ଚ୍ଚ କରିଛନ୍ତି । ଟଙ୍କା ବଳରେ ଆକାଶରେ ଉଡ଼ିବାର ମୋହ ପାଇଥିବା ପାଠକ ପରିବାର ପୂର୍ବରୁ ଅନେକଥର ବିଦେଶ ଭ୍ରମଣ କରିଛନ୍ତି ।

ବିପୁଳ ଟଙ୍କାକୁ ଖର୍ଚ୍ଚ କରି ପାରୁ ନ ଥିବା ପୁଅ ଆକାଶ ପାଠକ ନିଜ ପାଖରେ ୪ ବାଉନ୍ସର୍ ରଖିଥିଲା ବେଳେ ପ୍ରେମିକାଙ୍କ ପାଇଁ ୬ ବାଉନ୍ସର ଯୋଗାଇଥିଲା ।

ଚଢ଼ଉ ଜାରି ରହିଥିବାରୁ ଅଭୟ ପାଠକଙ୍କ ମୋଟ ସମ୍ପତ୍ତି ଆକଳନ କରାଯାଇନାହିଁ । ତେବେ ବର୍ତ୍ତମାନ ସୁଦ୍ଧା ତାଙ୍କର ଆୟଠାରୁ ବ୍ୟୟ ୨୦୦୦ ଗୁଣା ଅଧିକ ବୋଲି ଆକଳନ ହୋଇଥିବା ଜଣେ ଅଧିକାରୀଙ୍କ ସୂତ୍ରରୁ ଜଣାପଡ଼ିଛି । ଆସନ୍ତାକାଲି ଚଢ଼ାଉ ଜାରି ରହିବ । ଚଢ଼ଉ ସରିଲା ପରେ ଯାଇ ତାଙ୍କ ପ୍ରକୃତ ସମ୍ପତ୍ତି ପରିମାଣର ହିସାବ ମିଳିବ ବୋଲି ସେ କହିଛନ୍ତି ।

ବିଜେଡ଼ି ବିଧାୟକଙ୍କ ଝିଅ ସାଙ୍ଗେ ହୋଇଥାନ୍ତା ଆକାଶର ବାହାଘର

ପୂର୍ବତନ ମନ୍ତ୍ରୀ ତଥା ବିଜେଡ଼ି ବିଧାୟକଙ୍କ ଝିଅ ସାଙ୍ଗେ ଅଭୟ ଠାକୁରଙ୍କ ପୁଅ ଆକାଶର ବାହାଘର ସ୍ଥିର ହୋଇଥିଲା । ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଥିଲା ଏବଂ ଆସନ୍ତା ଡିସେମ୍ବର ୧୧ତାରିଖରେ ହାତଗଣ୍ଠି ପଡିଥାଆନ୍ତା । ସେଥିପାଇଁ ଭବ୍ୟ ପ୍ରସ୍ତୁତି ସରିଥିଲା । ରାଜସ୍ଥାନର ଉଦୟପୁରର ଏକ ପ୍ୟାଲେସରେ ବାହାଘର ପାଇଁ ବୁକିଂ ସରିଥିଲା । ବରଯାତ୍ରୀଙ୍କୁ ନେବା ପାଇଁ ବିମାନ ମଧ୍ୟ ବୁକ୍ ହୋଇଥିଲା । ଏସବୁ ବାବଦରେ ୨ କୋଟି ଟଙ୍କାର ବିଲ୍ ଭିଜିଲାନସ୍ ହାତରେ ପଡ଼ିଛି । ରାଜସ୍ଥାନରେ ସମସ୍ତେ ଯୋଗଦେବା ସମ୍ଭବ ନ ଥିବାରୁ ଭୁବନେଶ୍ୱରର ଏକ ତାରକା ହୋଟେଲ୍ ରେ ବିବାହ ପୂର୍ବରୁ ଲମ୍ବା ପାର୍ଟି ଦିଆଯାଇଥିବା ଜଣାପଡ଼ିଛି । ୭ ଦିନ ଧରି ଚାଲିଥିବା ଏହି ଭୋଜିରେ ଉଭୟ ପକ୍ଷର ସମ୍ପର୍କୀୟ ଓ ବନ୍ଧୁବାନ୍ଧବ ଯୋଗଦେଇଥିଲେ । ଏ ବାବଦରେ ଗୁଡ଼ାଏ ଟଙ୍କା ଖର୍ଚ୍ଚ ହୋଇଥିବା ଭିଜିଲାନସ୍ ଜାଣିବାକୁ ପାଇଛି ।