ଭୁୁବନେଶ୍ୱର: ଛୋଟ ଛୋଟ ସରଳିଆ ପିଲା । କିଏ ଦେଖି ପାରୁ ନ ଥିଲେ ତ କିଏ କଥା କହିପାରୁ ନଥିଲେ ଅବା ଆଉ କିଏ ଶୁଣି ପାରୁ ନ ଥିଲେ । କାହାର ଗୋଡ ତ ଆଉ କାହାର ହାତରେ ଥିଲା ଜଖମ । ହେଲେ ସେମାନଙ୍କ ନିଶ୍ଚାପ ମନରେ ନ ଥିଲା ଦୁଃଖ କି ଅବଶୋଷ । ସାଧାରଣ ମଣିଷଙ୍କ ଭଳି ସେମାନଙ୍କ ମନରେ ଥିଲା ଅଦମ୍ୟ ଉତ୍ସାହ । ଦୁନିଆର ସବୁତକ ହସ ଫୁଟାଉଥିଲେ ନିଜ ମୁହଁରେ । ଏହି ହସ କାହାଠାରୁ ଦୟାରେ ଆଣି ନ ଥିଲେ । ନିଜର ପ୍ରତିଭା ବଳରେ ସାଉଁଟୁଥିଲେ ଶହ ଶହ ପ୍ରଂଶସା ଓ କରତାଳି ।
ଜଣେ ଦୁଇ ଜଣ ନୁହଁନ୍ତି ପାଖାପାଖି ୩ ହଜାର ପ୍ରତିଭାଧାରୀ ଦିବ୍ୟାଙ୍ଗ ମୁହଁରେ ଫୁଟି ଉଠିଥିଲା ହସ । ଆସର ଥିଲା ‘ଦିବ୍ୟାଙ୍ଗ ମହୋତ୍ସବ-୨୦୧୮’ । ‘ନନ୍ଦିନୀ’ ଓ ‘ବ୍ରିଙ୍ଗ୍ ସ୍ମାଇଲ୍’ ଅନୁଷ୍ଠାନର ମିଳିତ ସହଯୋଗରେ ରବିବାର ଦିନ ଭୁବନେଶ୍ୱରର ବିପିନ ବିହାରୀ ଚୌଧୁରୀ ସ୍କୁଲ ପରିସରରେ ଆୟାଜିତ ଏହି ମହୋତ୍ସବ ବେଶ୍ ଧୂମ ଧଡ଼ାସ ଥିଲା । ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ବିଭିନ୍ନ ସ୍କୁଲରୁ ଆସିଥିବା ଛାତ୍ରଛାତ୍ରୀମାନେ ନାଚ, ଗୀତରେ ଦେଖାଇଥିଲେ ସେମାନଙ୍କ ପ୍ରତିଭା । ପ୍ରତିଭାରେ କେହି କାହାରିଠାରୁ କମ୍ ନ ଥିଲେ । ଦୀର୍ଘ ୫ ଘଣ୍ଟା ଧରି ବିଭିନ୍ନ ପର୍ଯ୍ୟାୟରେ ସେମାନେ ନିଜ ନିଜର ପ୍ରତିଭା ପ୍ରଦର୍ଶନ କରୁଥିଲେ । ଏହି ପିଲାମାନଙ୍କ ଅର୍ନ୍ତନିହିତ ପ୍ରତିଭା ଓ ଦକ୍ଷତା ଦେଖି ସେଠାରେ ଉପସ୍ଥିତ ସାଧାରଣ ଦର୍ଶକଙ୍କ ଆଖିରେ ଲୁହ ଭରି ହୋଇଯାଇଥିଲା । ଦିବ୍ୟାଙ୍ଗଙ୍କ ମୁହଁରେ ହସ ଫୁଟାଇବାରେ ମୁଖ୍ୟ ଭୂମିକା ନେଇଥିବା କାର୍ଯ୍ୟକ୍ରମର ମୁଖ୍ୟ ଆୟୋଜକ ତଥା ‘ନନ୍ଦିନୀ’ ସମ୍ପାଦକ ହେମନ୍ତ ରଥଙ୍କର ସମସ୍ତେ ଭୂରି ଭୂରି ପ୍ରଶଂସା କରିଥିଲେ ।
